ຄື້ນຄວາມຮ້ອນພັດປົກຄຸມການາດາ ເສຍຊີວິດແລ້ວກວ່າ 50 ຄົນ

ສຳນັກຂ່າວຕ່າງປະເທດລາຍງານ 7 ກໍລະກົດ 2018 ວ່າ: ສຳນັກງານສາທາລະນະສຸກແຫ່ງລັດຄວິເບກ ປະເທດການາດາ ລາຍງານຈຳນວນຜູ້ເສຍຊີວິດຈາກອິດທິພົນຂອງຄື້ນຄວາມຮ້ອນ ທີ່ແຜ່ປົກຄຸມພື້ນທີ່ສ່ວນໃຫຍ່ຂອງພາກຕາເວັນອອກຂອງການາດາເກືອບ 1 ອາທິດທີ່ຜ່ານມາ ວ່າເພີ່ມຂຶ້ນຢ່າງຕໍ່ເນື່ອງເປັນຢ່າງໜ້ອຍ 54 ຄົນແລ້ວ ພົບຫຼາຍທີ່ສຸດໃນເມືອງມອນທີອອນ ເຊິ່ງເປັນເມືອງເອກຂອງລັດຄວິເບກ ທີ່ມີຜູ້ເສຍຊີວິດ 28 ຄົນ ສ່ວນໃຫຍ່ເປັນຜູ້ຊາຍ ແລະ ມີອາຍຸ 50 ປີຂຶ້ນໄປ.

My thoughts are with the loved ones of those who have died in Quebec during this heat wave. The record temperatures are expected to continue in central & eastern Canada, so make sure you know how to protect yourself & your family: https://t.co/JSPPsU80x9

— Justin Trudeau (@JustinTrudeau) July 4, 2018

ນອກຈາກນີ້, ລັດອອນແທຣີໂອ ທີ່ຢູ່ຕິດກັບລັດຄວິເບກກຳລັງປະເຊີນກັບຄື້ນຄວາມຮ້ອນເຊັ່ນກັນ ແຕ່ຍັງບໍ່ມີລາຍງານຜູ້ເສຍຊີວິດ, ເຖິງຢ່າງໃດກໍ່ຕາມ ສຳນັກງານອຸຕຸນິຍົມວິທະຍາແຫ່ງຊາດການາດາ ພະຍາກອນອຸນຫະພູມສະເລ່ຍຂອງປະເທດ ໂດຍສະເພາະໃນພາກກາງ ແລະ ພາກຕາເວັນອອກວ່າ ຈະເຢັນຂຶ້ນໂດຍຢູ່ທີ່ 23 ເຖິງ 25 ອົງສາເຊ ພາຍຫຼັງທີ່ຂຶ້ນສູງເຖິງ 33.8 ອົງສາ ເມື່ອວັນພະຫັດທີ່ຜ່ານມາ ແຕ່ຄວາມຊຸ່ມໃນອາກາດອາດເຮັດໃຫ້ຮູ້ສຶກຄືກັບວ່າຢູ່ທ່າມກາງອຸນຫະພູມ 45 ອົງສາເຊ, ໃນດ້ານຂອງທ່ານ ຈັສຕິນ ທຣູໂດ ນາຍົກລັດຖະມົນຕີການາດາ ລົງຂໍ້ຄວາມໃນ Twitter ສະແດງຄວາມເສຍໃຈໄປຍັງຄອບຄົວຂອງຜູ້ເສຍຊີວິດ ແລະ ເຕືອນໃຫ້ປະຊາຊົນເພີ່ມການຮັກສາສຸຂະພາບ.

ອີກຢ່າງໜຶ່ງ, ການາດາເຄີຍປະເຊີນກັບອິດທິພົນຈາກຄື້ນຄວາມຮ້ອນຄັ້ງຮຸນແຮງມາແລ້ວ ເມື່ອຄື 2010 ສົ່ງຜົນໃຫ້ມີຜູ້ເສຍຊີວິດປະມານ 100​ ຄົນ ສະເພາະຢູ່ທີ່ເມືອງມອນທຣີອອນ ເຊິ່ງເປັນເມືອງໃຫຍ່ອັນດັບ 2 ຂອງປະເທດ ຮອງຈາກເມືອງໂຕຣອນໂຕ ທີ່ຢູ່ພາກໃຕ້ຂອງການາດາ.