ປ.ທຣຳ ເຊື່ອໝັ້ນວ່າ ຈີນຈະເປັນຝ່າຍຖອຍ ໃນສົງຄາມການຄ້າທີ່ເຄັ່ງຕຶງຢູ່ຂະນະນີ້

ສຳນັກຂ່າວຕ່າງປະເທດລາຍງານ 9 ເມສາ 2018 ວ່າ:​ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລົງຂໍ້ຄວາມໃນ Twitter ເມື່ອວັນອາທິດທີ່ຜ່ານມາວ່າ: ທ່ານ ກັບ ທ່ານ ສີ ຈິ້ນຜິງ ປະທານປະເທດຈີນ ຈະເປັນເພື່ອນມິດຕໍ່ກັນສະເໜີ ບໍ່ວ່າຈະເກີດຍັງຂຶ້ນກັບຄວາມຂັດແຍ່ງລະຫວ່າງກັນໃນເລື່ອງນະໂຍບາຍການຄ້າ, ທ່ານເຊື່ອວ່າຈີນຈະເປັນຝ່າຍຫຼຸດຜ່ອນກຳແພງພາສີລົງ ເພາະເປັນສິ່ງທີ່ຖືກຕ້ອງ, ຂະນະດຽວກັນຜູ້ນຳ ສະຫະລັດ ອາເມຣິກາ ຍັງສະແດງຄວາມເຊື່ອໝັ້ນໃນເລື່ອງຂອງການບັນລຸຂໍ້ຕົກລົງທີ່ເປັນການເພິ່ງພາອາໄສເຊິ່ງກັນ ແລະ ກັນກັບລັດຖະບານຈີນ ໃນບັນຫາຄວາມຂັດແຍ່ງດ້ານພາສີ ແລະ ຊັບສິນທາງປັນຍາ ເພື່ອຜົນປະໂຫຍດຂອງທັງສອງປະເທດໃນໄລຍະຍາວ.

President Xi and I will always be friends, no matter what happens with our dispute on trade. China will take down its Trade Barriers because it is the right thing to do. Taxes will become Reciprocal & a deal will be made on Intellectual Property. Great future for both countries!

— Donald J. Trump (@realDonaldTrump) April 8, 2018

ເຖິງແມ່ນວ່າຍັງບໍ່ມີລາຍງານຢ່າງຊັດເຈນວ່າ ທ່ານ ໂດໂນ ທຣຳ ແລະ ທ່ານ ສີ ຈິ້ນຜິງ ໄດ້ສົນທະນາກັນທາງໂທລະສັບຫຼືບໍ່ ໃນໄລຍະທີ່ບັນຍາກາດຂອງຄວາມຂັດແຍ່ງທາງການຄ້າເຄັ່ງຕຶງຢ່າງໜັກໜ່ວງ ແຕ່ຫຼາຍຝ່າຍຕີລາຄາວ່າ ການລົງຂໍ້ຄວາມດັ່ງກ່າວຂອງທ່ານ ໂດໂນ ທຣຳ ຄືຄວາມພະຍາຍາມຄັ້ງຫຼ້າສຸດຂອງຜູ້ນຳສະຫະລັດ ອາເມຣິກາ ໃນການຫຼຸດຜ່ອນຄວາມເປັນຫ່ວງຂອງທຸກຝ່າຍ ທີ່ມີຕໍ່ສະຖານະການຄວາມຂັດແຍ່ງທາງການຄ້າລະຫວ່າງສະຫະລັດ ອາເມຣິກາ ກັບ ຈີນ, ປະເທດທີ່ມີຂະໜາດເສດຖະກິດໃຫຍ່ເປັນອັນດັບ 1 ແລະ 2 ຂອງໂລກຕາມລຳດັບ ຈາກການທີ່ເມື່ອທ້າຍອາທິດທີ່ຜ່ານມາ ທ່ານ ໂດໂນ ທຣຳ ໄດ້ມອບໝາຍໃຫ້ສຳນັກງານຄະນະຜູ້ແທນການຄ້າຫາທາງຮຽກເກັບພາສີສິນຄ້າຈາກຈີນເພີ່ມອີກ 100,000 ລ້ານໂດລາສະຫະລັດ ຈາກເດີມທີ່ເຄີຍປະກາດແນວທາງໄປແລ້ວ 50,000 ລ້ານໂດລາສະຫະລັດ ຄວບຄຸມຈຳນວນລາຍການສິນຄ້າ 1,300 ລາຍການ ສ່ວນໃຫຍ່ເປັນສິນຄ້າດ້ານເຕັກໂນໂລຊີ ແລະ ອຸດສາຫະກຳຍານພາຫະນະ ລວມເຖິງຍານພາຫະນະທາງອາກາດ.

ເຖິງຢ່າງໃດກໍ່ຕາມ, ລັດຖະບານຈີນກໍ່ໄດ້ຕອບໂຕ້ສະຫະລັດ ອາເມຣິກາ ຢ່າງທັນເຫດທັນການ ດ້ວຍການຕັ້ງກຳແພງພາສີສິນຄ້າຂອງສະຫະລັດ ອາເມຣິກາ ຢ່າງໜ້ອຍ 234 ລາຍການ ໃນຈຳນວນນີ້ຢ່າງໜ້ອຍ 106 ລາຍການ ຕ້ອງຖືກອັດຕາພາສີ 25% ເຊິ່ງລວມເຖິງສິນຄ້າກະສິກຳສົ່ງອອກສຳຄັນຂອງສະຫະລັດ ອາເມຣິກາເຊັ່ນ: ຖົ່ວເຫຼືອງ, ສາລີ, ເຂົ້າສາລີ ແລະ ເຂົ້າຟາງ ລວມໄປເຖິງຍານພາຫະນະທາງອາກາດ ແລະ ຍານພາຫະນະທົ່ວໄປ ເຮັດໃຫ້ເກີດສຽງວິພາກວິຈານຈາກຜູ້ປະກອບການສິນຄ້າທີ່ກ່ຽວຂ້ອງໃນສະຫະລັດ ອາເມຣິກາ ແລະ ໄດ້ລວມຕົວກັນຮຽກຮ້ອງໃຫ້ທ່ານ ໂດໂນ ທຣຳ ເລັ່ງຫາແນວທາງແກ້ໄຂ.

ໃນດ້ານຂອງທ່ານ ແລຣີ ຄຸດໂລ ທີ່ປຶກສາດ້ານນະໂຍບາຍເສດຖະກິດຂອງທຳນຽບຂາວກ່າວຢ້ຳວ່າ ສະຖານະການທີ່ເກີດຂຶ້ນ ຍັງບໍ່ແມ່ນສົງຄາມການຄ້າ ເນື່ອງຈາກກຳແພງພາສີສ່ວນໃຫຍ່ ຍັງບໍ່ມີຜົນບັງຄັບໃຊ້ ນອກເໜືອຈາກການຂຶ້ນພາສີເຫຼັກ ແລະ ອະລູມິນຽມ ແລະ ທ່າທີຂອງສະຫະລັດ ອາເມຣິກາ ໃນຕອນນີ້ຄືເພື່ອເພີ່ມແຮງກົດດັນໃຫ້ຈີນປ່ຽນແປງພຶດຕິກຳ ດ້ານການດຳເນີນນະໂຍບາຍການຄ້າເທົ່ານັ້ນ.