ຍົນກອງທັບອານເຊຣີຕົກ ເສຍຊີວິດແລ້ວກວ່າ 180 ຄົນ (ວິດີໂອ)

ສຳນັກຂ່າວຕ່າງປະເທດລາຍງານ 11 ເມສາ 2018 ວ່າ: ຍົນ Il-76 ຂອງກອງທັບອາເຊຣີ ຕົກພາຍຫຼັງຂຶ້ນບິນໄດ້ບໍ່ດົນຈາກສະໜາມບິນໃນຖານທັບບູຟາຣິກ, ຈຸດຕົກຫ່າງປະມານ 30 ກິໂລແມັດ ໄປທາງທິດຕາເວັນຕົກສຽງໃຕ້ຂອງນະຄອນແອວເຈຍ ໂດຍຍົນອອກຈະອອກເດີນທາງໄປສູ່ຖານທັບໃນເມືອງເບຊາ ທາງພາກຕາເວັນຕົກສຽງໃຕ້ຂອງປະເທດ ແລະ ຈະແວ່ຈອດທີ່ເມືອງທິນດູບ.

ທ່ານ ໂມຮຳເໝັດ ອາຊູ ໂຄສົກສຳນັກງານປ້ອງກັນໄພອານເຊຣີ ກ່າວວ່າ ຍົນລຳດັ່ງກ່າວບັນທຸກທະຫານ ແລະ ມີລາຍງານເບື້ອງຕົ້ນລະບຸວ່າ ມີຜູ້ເສຍຊີວິດຢ່າງໜ້ອຍ 100 ຄົນ, ສ່ວນສາເຫດຍັງບໍ່ຮູ້ຊັດເຈນ ທາງການກຳລັງເລັ່ງສືບສວນ, ຂະນະທີ່ລາຍງານຂອງເວັບໄຊທ໌ຂ່າວ TSA ຂອງອານເຊຣີ ອ້າງອີງການເປີດເຜີຍຂອງເຈົ້າໜ້າທີ່ໜ່ວຍກູ້ໄພວ່າ ມີຜູ້ເສຍຊີວິດ 105 ຄົນ.

ຫຼ້າສຸດບາງສຳນັກຂ່າວລາຍງານວ່າ: ຍົນລຳດັ່ງກ່າວບັນທຸກທະຫານກວ່າ 200 ຄົນ ແລະ ມີຜູ້ເສຍຊີວິດແລ້ວກວ່າ 180 ຄົນ.

Il-76 ເປັນທັງຍົນຂົນສົ່ງລຳລຽງຂອງກອງທັບ ແລະ ຍົນຂົນສົ່ງທາງທຸລະກິດ ອອກແບບໃນສະໄໝຂອງສະຫະພາບໂຊວຽດ ແລະ ເລີ່ມຜະລິດໃນຊຸມປີ 1970 ສາມາດບັນທຸກຜູ້ໂດຍສານໄດ້ປະມານ 120 ຄົນ ສະຖິຕິໂດຍລວມມີຄວາມປອດໄພສູງ.