ສ.ອາເມຣິກາເຊື່ອໝັ້ນ ແນວທາງນະໂຍບາຍຂອງເກົາຫຼີໃຕ້ ຕໍ່ເກົາຫຼີເໜືອຈະບໍ່ປ່ຽນແປງ

ສຳນັກຂ່າວຕ່າງປະເທດລາຍງານ 11 ກຸມພາ 2018 ວ່າ: ທ່ານ ໄມ ເພນ ຮອງປະທານປະເທດສະຫະລັດ ອາເມຣິກາກ່າວພາຍຫຼັງສຳເລັດການເຂົ້າຮ່ວມພິທີເປີດໂອລິມປິກລະດູໜາວ ທີ່ເມືອງປຽງຊາງ ໃນເກົາຫຼີໃຕ້ ເມື່ອວັນສຸກທີ່ຜ່ານມາວ່າ ບໍ່ມີນະໂຍບາຍທີ່ສະຫະລັດ ອາເມຣິກາ, ເກົາຫຼີໃຕ້ ແລະ ຍີ່ປຸ່ນ ຈະຫຼຸດຜ່ອນມາດຕະການກົດດັນຂັ້ນສູງສຸດ ທັງໃນດ້ານການທູດ ແລະ ເສດຖະກິດຕໍ່ເກົາຫຼີເໜືອ ຈົນກວ່າອີກຝ່າຍຈະຍອມຍົກເລີກຄວາພະຍາຍາມຕໍ່ກັບໂຄງການພັດທະນາຂີປະນາວຸດ ແລະ ລະເບີດນິວເຄຼຍຂອງຕົນເອງ.

ຂະນະດຽວກັນ ທ່ານ ໄມ ເພນ ຍັງໄດ້ກ່າວເຖິງການປຶກສາຫາລືຄັ້ງສຳຄັນລະຫວ່າງທ່ານ ມູນ ແຈ-ອິນ ປະທານປະເທດເກົາຫຼີໃຕ້ ກັບຄະນະຜູ້ແທນລະດັບສູງຂອງລັດຖະບານເກົາຫຼີເໜືອ ທີ່ໜຶ່ງໃນນັ້ນຄືທ່ານ ນາງ ຄິມ ໂຢ-ຈອງ ນ້ອງສາວຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອວ່າ ສະຫະລັດ ອາເມຣິກາຄັດຄ້ານການເຈລະຈາລະຫວ່າງສອງເກົາຫຼີໃນລະດັບຜູ້ນຳສູງສຸດ ຈົນກວ່າເກົາຫຼີເໜືອຈະຍອມຮ່ວມການເຈລະຈາເພື່ອຢຸດຕິໂຄງການນິວເຄຼຍເປັນການຖາວອນເທົ່ານັ້ນ ແລະ ກ່າວເຖິງການຢ້ຽມຢາມປຽງຊາງ ແລະ ນະຄອນຫຼວງໂຊຂອງທ່ານ ນາງ ຄິມ ໂຢ-ຈອງ ວ່າເປັນການຮຽກຮ້ອງຄວາມສົນໃຈຂອງຊາວໂລກໄປຈາກການແຂ່ງຂັນກີລາໂອລິມປິກລະດູໜາວ ດ້ວຍນະໂຍບາຍໂຄສະນາຊວນເຊື່ອແບບອ່ອນນ້ອມຂອງລັດຖະບານເກົາຫຼີເໜືອ.

ເຊິ່ງທ່ານ ນາງ ຄິມ ໂຢ-ຈອງ ໄດ້ນຳສານຂອງທ່ານ ຄິມ ຈອງ-ອຶນ ຜູ້ເປັນອ້າຍ ມາມອບໃຫ້ແກ່ທ່ານ ມູນ ແຈ-ອິນ ເພື່ອເຊື່ອເຊີນໄປຢ້ຽມຢາມນະຄອນຫຼວງປຽງຢາງຢ່າງເປັນທາງການ ແລະ ໄວທີ່ສຸດເທົ່າທີ່ຈະໄວໄດ້ ເພື່ອປຶກສາຫາລື ແລະ ແລກປ່ຽນເປັນການພາຍໃນລະຫວ່າງສອງເກົາຫຼີ ເຊິ່ງການປະຊຸມທີ່ເກີດຂຶ້ນຈະຖືເປັນຄັ້ງທີ 3 ຕໍ່ຈາກການປະຊຸມຄັ້ງທຳອິດໃນສະໄໝການເປັນປະທານປະເທດເກົາຫຼີໃຕ້ຂອງທ່ານ ຄິມ ແດ-ຈຸງ ເມື່ອເດືອນມິຖຸນາ ປີ 2000 ແລະ ຄັ້ງທີ 2 ເຊິ່ງເກີດຂຶ້ນເມື່ອເດືອນມິຖຸນາ 2007 ໃນສະໄໝຂອງທ່ານ ໂນ ມູ-ຮະຢອນ ໂດຍຜູ້ນຳເກົາຫຼີໃຕ້ທັງສອງທ່ານໄດ້ພົບປະຫາລືກັບທ່ານ ຄິມ ຈອງ-ອິວ ຜູ້ນຳສູງສຸດຂອງເກົາຫຼີເໜືອໃນເວລານັ້ນ ເຊິ່ງເປັນພໍ່ຂອງທ່ານ ຄິມ ຈອງ-ອຶນ ແລະ ທ່ານ ນາງ ຄິມ ໂຢ-ຈອງ.

I'm grateful for the strong relationship between the U.S & South Korea. We're going to stand solidly with South Korea and with all of our allies to continue to bring the maximum pressure to bear on North Korea. #VPinASIA pic.twitter.com/EfqB6yWLi0

— Vice President Mike Pence (@VP) February 10, 2018