ສ.ອາເມຣິກາ ວິຈານລັດເຊຍ ການປະກາດຢຸດຍິງຢູ່ເຂດກູຕາ ຕາເວັນອອກຂອງຊີຣີ ຄືຍຸດທະສາດສອງໜ້າ

ສຳນັກຂ່າວຕ່າງປະເທດລາຍງານ 28 ກຸມພາ 2018 ວ່າ: ທ່ານ ພົນເອກ ໂຈເຊບ ໂວເທວ ຜູ້ບັນຊາການສູນບັນຊາການກາງກອງທັບສະຫະລັດ ອາເມຣິກາ ກ່າວເມື່ອວັນອັງຄານ (27 ກຸມພາ) ທີ່ຜ່ານມາ ກ່ຽວກັບເລື່ອງທີ່ລັດເຊຍປະກາດຢຸດຍິງ ເພື່ອມະນຸດສະທຳ ມື້ລະ 5 ຊົ່ວໂມງ ໃນເຂດກູຕາ ຕາເວັນອອກ ຮອບນອກຂອງນະຄອນຫຼວງດາມັດສະກັດ ປະເທດຊີຣີ ລະຫວ່າງເວລາ 09:00-14:00 ຕາມເວລາທ້ອງຖິ່ນ ແລະ ມີຜົນເລີ່ມປະຕິບັດເມື່ອວັນອັງຄານ 27 ກຸມພາ 2018 ເປັນຕົ້ນມາ ວ່າເປັນຍຸດທະສາດສອງໜ້າຂອງລັດຖະບານລັດເຊຍ ທັງໃນດ້ານການທູດ ແລະ ການທະຫານ ເພື່ອເພີ່ມທະວີຄວາມຂັດແຍ່ງໃນສົງຄາມຄັ້ງນີ້ໃຫ້ລຸກລາມຂຶ້ນຕື່ມ.

“Diplomatically and militarily, Moscow plays both arsonist and firefighter, fueling tensions in Syria… then serving as an arbitrar to resolve disputes, attempting to undermine and weaken each party’s bargaining positions,” said Gen. Joseph Votel, @CENTCOM https://t.co/ggvYwyfpqj

— Stars and Stripes (@starsandstripes) February 27, 2018

ຂະນະທີ່ອົງກອນສັງເກດການດ້ານສິດທິມະນຸດຊີຣີລາຍງານວ່າ ເຖິງແມ່ນວ່າສະຖານະການການສູ້ຮົບໃນເຂດກູຕາ ຕາເວັນອອກຈະເບົາບາງລົງແນ່ແລ້ວ ໃນຊ່ວງເວລາທີ່ລັດເຊຍເຊິ່ງເປັນຝ່າຍສະໜັບສະໜູນລັດຖະບາຍຊີຣີປະກາດຢຸດຍິງເປັນເວລາ 5 ຊົ່ວໂມງ, ແຕ່ການສູ້ຮົບຜັດທະວີຄວາມຮຸນແຮງຂຶ້ນທັນທີ ເມື່ອຄົບກຳນົດເວລາດັ່ງກ່າວ, ສົ່ງຜົນໃຫ້ໜ່ວຍງານຫຼຸດຜ່ອນຄວາມທຸກຍາກສາກົນບໍ່ສາມາດອົບພະຍົບປະຊາຊົນ ແລະ ສົ່ງມອບການຊ່ວຍເຫຼືອເຂົ້າສູ່ເຂດສູ້ຮົບທີ່ປະສົບໄພໄດ້ ໂດຍຈຳນວນຜູ້ເສຍຊີວິດສະເພາະໃນສະໜາມຮົບກູຕາ ຕາເວັນອອກ ເຊິ່ງຢູ່ທ່າມກາງວົງລ້ອມຂອງກອງທັບລັດຖະບານຊີຣີ ເພີ່ມເປັນ 582 ຄົນ ນັບຕັ້ງແຕ່ວັນທີ 18 ກຸມພາ 2018 ທີ່ຜ່ານມາ.

ເຊິ່ງການປະກາດຢຸດຍິງຝ່າຍດຽວຂອງລັດເຊຍ ແລະ ການສ້າງຕັ້ງເສັ້ນທາງມະນຸດສະທຳ ເພື່ອອົບພະຍົບປະຊາຊົນລວມໄປເຖິງຜູ້ໄດ້ຮັບບາດເຈັບອອກຈາກເຂດກູຕາ ຕາເວັນອອກ ເກີດຂຶ້ນພາຍຫຼັງທີ່ຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ປະກາດໃຫ້ຢຸດຍິງເປັນເວລາ 30 ວັນ ເມື່ອວັນເສົາ (24 ກຸມພາ) ທີ່ຜ່ານມາ ແຕ່ບໍ່ໄດ້ຮັບການຕອບສະໜອງຈາກຝ່າຍໃດ.